Душанбе
Асосӣ / Хабарҳо
Бахшҳои сайт
Ҷустуҷӯ дар сайт
Хабарҳо
27 March 2019

ш.Душанбе. 27.03.2019. Имрӯз дар асоси дастури Раиси шаҳри Душанбе муҳтарам Рустами Эмомалӣ гурӯҳи кории мақомоти иҷроияи ҳокимияти давлатии шаҳри Душанбе дар робита ба муроҷиати шаҳрвандон бо вазъи санитарӣ-экологӣ ва фаъолияти муассисаи давлатии “Боғи ҳайвонот”-и пойтахт аз наздик шинос шуд.  

Зимни боздид аз Муассисаи давлатии “Боғи ҳайвонот”-и пойтахт гурӯҳи кории мақомоти иҷроияи ҳокимияти давлатии шаҳри Душанбе бо шароити нигоҳдошти ҳайвонот, ҳолати санитариву тозагии ҳуҷраҳо барои нигоҳдошт, панҷараҳо, ҳавзҳои парадагон ва роҳравҳо барои сайру гашти сокинон таваҷҷуҳ зоҳир намуд.

Муайян карда шуд, дар самти таъмини шароити нигоҳдории ҳайвонот ва тозагии ҳуҷраҳо, инчунин роҳравҳои боғ баъзе аз камбудиҳо ҷой доранд.

Аъзои гурӯҳи корӣ тамоми ҳуҷраҳо, панҷараҳо ва ҷойҳои махсуси нигоҳдории ҳайвонотро аз назар гузаронида, ба масъулин ҷиҳати таъмини шароити хуби санитариву экологии боғ, аз ҷумла нигоҳубини дурусти ҳайвонот, таъмини шароит нигоҳдошт бо риояи меъёрҳои марбута, таъмини масоҳати зарурӣ бо инобати ҳар як ҳайвони мавҷуда, пайваста тозаву озода нигоҳ доштани ҳуҷраҳои ҳайвонот, бартараф намудани бӯйи ғализ дар баъзе аз мавзеъҳои боғ, таъмини пурраи низоми корезӣ, нигоҳубин ва ба тартиб даровардани ниҳолу дарахтон ва майсазору гулзорҳо дар доираи имкониятҳои Муассиса дастур дода шуд.

Муассисаи давлатии “Боғи ҳайвонот”-и шаҳри Душанбе соли 1960 бунёд гардида, то имрӯз ба таври мунтазам фаъолият мекунад.

Ҳоло дар ин макони вуҳуш 135 навъи ҳайвонот бо шумораи умумии 985 сар маскун мебошанд.

Баҳри таъмини тозагиву ободонӣ ва нигоҳубини ҳайвонот 50 нафар кормандон фаъолият намуда, аз ҷумла 32 нафар мутахассисони варзида сафарбар гардиданд.

Давоми чанд соли охир дар асоси созишномаҳои байниҳукуматӣ аз як қатор кишварҳои хориҷӣ ба боғ намудҳои гуногуни ҳайвонот ворид карда шудаанд, ки диққати сокинонро ба худ ҷалб намудааст.

Гурӯҳи кории мақомоти иҷроияи ҳокимияти давлатии шаҳри Душанбе бо инобати он, ки имрӯз Боғи ҳайвоноти шаҳр ба яке аз ҷойҳои дидании сокинон ва меҳмонони пойтахт табдил гардидааст, роҳбарият ва кормандони Муассисаро муваззаф сохт, ки дар баробари таъмини тозагиву озодагӣ ва беҳсозии шароити санитариву экологӣ баҳри ба роҳ мондани хизматрасонии мусоир чораандешӣ намоянд.

Дар ин робита, ба масъулини Муассиса тавсия дода шуд, ки баҳри ҷорӣ намудани хизматрасонии муосир ба меҳмонону тамошобинон ба таври ғайринақдӣ-тавассути кортҳои электронӣ чораҳои заруриро роҳандозӣ намояд.    

Роҳбарияти Муассисаи давлатии “Боғи Ҳайвонот”- и шаҳр вазифадор гардид, ки тамоми нуқсону камбудиҳои ҷойдоштаро дар кӯтоҳтарин муҳлат бартараф намуда, ҷиҳати роҳ надодан ба чунин ҳолатҳо назорати доимиро ба роҳ монад.