Боғи фарҳангу фароғатии умумишаҳрӣ дар пойтахт
Асосӣ / Хабарҳо
Бахшҳои сайт
Ҷустуҷӯ дар сайт
Хабарҳо
2 August 2011

1 августи соли 2011 дар Мақомоти иҷроияи маҳаллии ҳокимияти давлатӣ дар шаҳри Душанбе ҷаласаи васеи кории шаҳрдорӣ зери раёсати Маҳмадсаид Убайдуллоев баргузор гардид.

Дар кори ҷаласа  дар радифи масъулини сохторҳои дахлдори шаҳрдорӣ намояндагони бахши савдо ва тиҷорати шаҳр, аз ҷумла соҳибкорони ба интиқол ва фурӯши маҳсулоти гӯштӣ ва маводи сӯзишворӣ машғулиятдошта, имомхатибони масҷидҳои панҷвақта ва ҷомеъ иштирок намуданд.

Масъалаи муҳимтарини ҷаласа дар қатори дигар масоили мубрами хоҷагидории шаҳр баррасии ғановати бозори истеъмолии шаҳр дар моҳи шарифи Рамазон ҳисоб мерафт.

Маҳмадсаид Убайдуллоев тибқи оини шаҳрдорӣ  кулли соҳибкорони дар бозори  истеъмолии пойтахт  фаъолиятдоштаро  ба инсофу  эҳтироми рисолати моҳи муборак  даъват намуда, директорони бозорҳои коммуналии шаҳр, Иттифоқи «Тоҷикматлубот» ва 20 нафар соҳибкорони растаи гӯштфурӯшии маҳаллаи  33-юми шаҳрро, ки барои  таъминоти аҳолии шаҳр бо гӯшт аз ҳисоби маблағҳои буҷети шаҳрӣ қарзҳои бефоиз дарёфт намудаанд, муваззаф сохт, ки бо нархи ҷории 23 сомонӣ фурӯши гӯшти хушсифати  говро дар шаҳр ба роҳ монанд.

Дар ин росто муқаррар гардид, ки баҳри дастгирии оилаҳои камбизоат ва муассисаҳои иҷтимоии шаҳр тадбирҳои муассир роҳандозӣ карда шаванд. Бо ин мақсад бобати ҳамовозӣ ибтикороти  роҳбари растаи гӯштфурӯшии маҳаллаи  33-юми шаҳр оид ба ҳамарӯза  1 тонна гӯшти гӯсфанд бо нари 23 сомонӣ барои муассисаҳои иҷтимоии шаҳр ва Иттифоқи «Тоҷикматлубот» ҳамарӯза 1 тонна гӯшти гов бо нархи 22 сомонӣ  барои оилаҳои камбизоат  дар асоси рӯйхати шаҳрдорӣ ҷонибдорӣ карда шуд.  Дар ин радиф роҳбарони бозорҳои   коммуналӣ ҳамарӯза 10 кг,  «Корвон», «Панҷшер» ва «Ганҷина»  ҳар кадоме 30 кг  ва дигар бозорҳои хусусӣ ҳар кадоме ҳамарӯза 5 кг гӯшти хушсифати говро тибқи рӯйхати шаҳрдорӣ ба оилаҳои камбизоат тариқи ройгон дастрас намоянд.

Баҳри коҳиш додани нархи маҳсулот дар тӯли моҳи Рамазон дастур гардид, ки санҷишҳои мақомоти дахлдори  назоратии давлатӣ, ба истиснои хадамоти санитарию бойторӣ дар бозорҳои ҳудуди шаҳр манъ дошта шуда, комиссияи марбутаи депутатию ҷамъиятӣ  нисбати масъалаи аз чинишҳои яквақтаинаи бозорӣ дар тамоми бозорҳо озод намудани соҳибкорони ба фурӯши маҳсулоти ғизоӣ  машғулиятдоштаро зимни омӯзиш таклифҳо унвонии шаҳрдорӣ иросол намоянд.

Баҳри ғановати бозори истеъмолӣ бо маҳсулоти тару тоза аз хоҷагиҳои ёрирасони аз ҷониби бозорҳои коммуналии шаҳрӣ дар ноҳияҳои тобеи марказ ва вилояти Хатлон таъсисдода, ҳамарӯза ворид намудани маҳсулоти ниёзи аввалия  комиссияҳои марбутаи депутатию ҷамъиятӣ барои дақиқ намудани воқеияти хизматрасонӣ ва  истеҳсоли маҳсулот мониторинги воридоти маҳсулот ба бозорҳо ва ҳолати хоҷагиҳои ёрирасонро зимни боздид арзёбӣ намоянд.

Зимнан барои тақвияти корҳои оммавӣ оид ба дар моҳи шарифи Рамазон даст задан бо кори хайрот ва  аз рӯи инсоф кор гирифтан дар савдои молу маҳсулот дастур гардид, ки потенсиали имомхатибони масҷидҳои ҷомеъ ва панҷвақтаи Душанбе дар маъракаи мазкур фаровон раҳнамун карда шавад.   Бо ин мақсад муқаррар гашт, ки дар бозорҳои коммуналӣ  имомхатибони масҷидҳои ҷомеъ ва дар бозорҳои хусусӣ имомхатибони масҷидҳои панҷвақта вобаста карда шаванд.

Дар робита ба масъалаи маводи сӯзишвории нақлиётӣ дар ҷаласа  соҳибкорон иқдом намуданд, ки дар моҳи Рамазон шурӯъ аз 2 августи соли ҷорӣ дар ҳама нуқтаҳои фурӯши маводи сӯзишворӣ дар шаҳр новобаста аз шакл ва тобеияти идоравӣ 1 литр  бензини навъи АИ-92 бо нархи 6 сомонию 20 дирам ва гази моеъро бо нархи 2 сомонию 90 дирам ба фурӯш мегузоранд.