ҶАМЪБАСТИ ДАВРИ ШАҲРИИ ОЗМУНИ ҶУМҲУРИЯВИИ “ИЛМ - ФУРӮҒИ МАЪРИФАТ”

26 Октябри 2021, Сешанбе

ш. Душанбе. 26.10.2021. Имруз дар шаҳри Душанбе маросими бошукӯҳи ҳавасмандгардонии даври шаҳрии озмуни ҷумҳуриявии «Илм - фурӯғи маърифат» ба таври тантанавӣ баргузор гардид. Дар маросими мазкур роҳбарияти мақомоти иҷроияи ҳокимияти давлатии шаҳри Душанбе, аъзои комиссияи озмунӣ, ҳайати ҳакамон, иштирокчиёни даври шаҳрии он аз ҳисоби хонандагону донишҷӯён, ходимони илмӣ ва дигар қишрҳои ҷомеа ширкат намуданд.

   Дар аввал муовини Раиси шаҳри Душанбе Мавсума Муинӣ паёми шодбошии мақомоти иҷроияи ҳокимияти давлатии шаҳри Душанберо ба ғолибон ва иштирокчиёни даври шаҳрии озмуни «Илм - фурӯғи маърифат» ироа намуда, аз ҷумла қайд намуд, ки: «Ташкил ва баргузории озмуни ҷумҳуриявии «Илм - фурӯғи маърифат» аз ташаббусҳои навбатии беназири Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти ҳавасмандгардонии қишрҳои гуногуни ҷомеа ба омўзишу донишандӯзӣ, навҷӯиву навоварӣ ва истифодаи имкониятҳои илм дар амал маҳсуб ёфта, он тибқи Амри Президенти Ҷумҳурии Тоҷикистон аз 11 феврали соли 2021, таҳти №АП-44 дар доираи амалисозии барномаи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» бори аввал роҳандозӣ мегардад». Мавсуф инчунин иброз намуд, ки: «мақомоти иҷроияи ҳокимияти давлии шаҳри Душанбе бо мақсади иҷрои амри мазкур тамоми чораҳоро амалӣ намуда, дар ин самт пеш аз ҳама қарори Раиси шаҳри Душанбе аз 11 майи соли 2021, таҳти №260 «Дар бораи баргузор намудани озмуни ҷумҳуриявии «Илм - фурӯғи маърифат» дар шаҳри Душанбе» ба тасвиб расонида шуд, ки қарори мазкур масъалаи ташкили даври шаҳрии озмун ва ҳавасмандгардонии ғолибони онро аз рӯйи бахшҳои алоҳида бо пешбинӣ намудани мукофотпулиҳо муқаррар намуд».

    Маврид ба зикр аст, ки Баргузории озмуни ҷумҳуриявии «Илм - фурӯғи маърифат» дар шаҳри Душанбе ба сабқати воқеии ҳаводорони илм ва навоварону навҷӯён табдил ёфта, дар даврҳои аввали он шумораи зиёди довталабон ширкат намуда, 273 нафар ғолибони даври ноҳиявӣ дар даври шаҳрии он ширкат намуданд. Даври шаҳрии озмун аз 4 то 6-уми октябри соли ҷорӣ аз рӯйи ҳафт номинатсия байни хонандагону донишҷӯён, ходимони илм ва дигар қишрҳои ҷомеа баргузор гардида, дар натиҷа ғолибон аз ҷониби ҳайати ҳакамон, ки аз ҳисоби ходимони шинохтаи илми ҷумҳурӣ таъсис ёфта буд, муқаррар карда шуданд. Қайд гардид, ки барои ҳавасмандгардонии ғолибони даври шаҳрии озмуни ҷумҳуриявии «Илм - фурӯғи маърифат» бо дастгирии бевоситаи Раиси шаҳри Душанбе муҳтарам Рустами Эмомалӣ аз ҳисоби фонди захиравии Раиси шаҳр 1 млн. 600 ҳазор сомонӣ маблағ ҷудо карда шуда, дар баробари ғолибони озмун бо пайравӣ ба сиёсат ва ҳидоятҳои Пешвои муаззами миллат 35 нафар омӯзгорони хонандагоне, ки шогирдонашон дар даври шаҳрӣ сазовори ҷойҳои намоён гаштаанд, низ бо мукофотпулӣ қадрдонӣ карда шуданд.

    Дар идома ғолибони озмун, ки аз рӯйи ҳафт номинатсия, ки 75 нафарро ташкил медоданд, бо ҷоми ғолиб, мукофотпулӣ ва диплому сипосномаҳои мақомоти иҷроияи ҳокимияти давлатии шаҳри Душанбе дар вазъияти тантанавӣ қадрдонӣ карда шуданд.

Дар фарҷоми чорабинӣ ба ифтихори ғолибони даври шаҳрии озмуни ҷумҳуриявии «Илм - фурӯғи маърифат» аз ҷониби наврсони соҳибистеъдод барномаи ҷолиби фарҳангӣ пешниҳод карда шуд.

 

 

 

 

 

 

 

Илова кунед