Тоҷикӣ
ҚАРОРИ РАИСИ ШАҲРИ ДУШАНБЕ №187 АЗ 08.04.2024
Дар бораи ташкил ва баргузории озмуни шаҳрии «Забон донӣ-ҷаҳон донӣ»
Бо мақсади ҷалби оммавии хонандагони муассисаҳои таҳсилоти миёнаи умумӣ ба забономӯзӣ, инкишофи зеҳнӣ ва ҷаҳонбинӣ, сайқал додани заковат ва малакаҳои забондонӣ, дарёфт, муаррифӣ ва ҳавасмандгардонии истеъдодҳои нав дар ин самт, мутобиқи моддаҳои 19 ва 20 Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ»
ҚАРОР МЕКУНАМ:
1. Озмуни шаҳрии «Забон донӣ-ҷаҳон донӣ» байни хонандагони муассисаҳои таҳсилоти миёнаи умумии шаҳри Душанбе дар соли 2024 ташкил ва баргузор карда шавад.
2. Низомнома, ҳайати комиссия, ҳайати ҳакамон ва харҷномаи озмуни шаҳрии «Забон донӣ-ҷаҳон донӣ» тасдиқ карда шаванд (замимаҳои 1, 2, 3 ва 4).
3. Муовини Раиси шаҳри Душанбе, сарпарасти соҳа, раисони ноҳияҳои шаҳри Душанбе, шуъбаи рушди иҷтимоӣ ва робита бо ҷомеаи дастгоҳи Раиси шаҳри Душанбе ва Сарраёсати маорифи шаҳри Душанбе ҷиҳати дар сатҳи баланди ташкилӣ баргузор намудани озмуни шаҳрии «Забон донӣ-ҷаҳон донӣ» тадбирҳои амалӣ андешанд.
4. Сарраёсати Вазорати молияи Ҷумҳурии Тоҷикистон дар шаҳри Душанбе аз ҳисоби маблағҳои фонди захиравии Раиси шаҳри Душанбе ҷиҳати ташкил ва баргузории озмуни шаҳрии «Забон донӣ-ҷаҳон донӣ» маблағи 177640 (як саду ҳафтоду ҳафт ҳазору шашсаду чиил) сомониро бо дарназардошти андозҳо ба Шуъбаи муҳосиботи дастгоҳи Раиси шаҳри Душанбе ҷудо намояд.
5. Шуъбаи муҳосиботи дастгоҳи Раиси шаҳри Душанбе мувофиқи тартиби муқарраргардида пардохти маблағи зикргардидаро сари вақт таъмин созад.
6. Шуъбаи иттилооти дастгоҳи Раиси шаҳри Душанбе, муассисаҳои давлатии «Телевизиони Душанбе» ва рӯзномаи «Паёми Душанбе» инъикоси васеи муҳтавои қарори мазкур ва ҷараёни амалишавии онро тариқи васоити ахбори омма таъмин намоянд.
7. Қарори мазкур барои тасдиқ ба Маҷлиси вакилони халқи шаҳри Душанбе пешниҳод карда шавад.
8. Назорати иҷрои қарори мазкур ба зиммаи муовини Раиси шаҳри Душанбе, сарпарасти соҳа гузошта шавад.
Рустами Эмомалӣ
